Binabalaw ti charity arm ti Roman Catholic Church ti panangkessay ni United States President Donald Trump kadagiti United States foreign aid wenno tulong a maipapaay.
Patien ti nasao a simbaan a ti panggep ni Trump a mangkessay ti pondo para iti relief agency nga USAID ket nakaro iti epektona nangruna kadagiti developing world.
Iti maysa nga statement, kinuna ti Caritas Internationalis a ti awan asi a wagas ket mangitunda iti peggad iti biag ken dignidad ti minilmilion a tattao.
Ti maaw-awat gamin dagiti nagduduma a grupo a kuarta manipod iti USAID ken pondo ti gobierno ti Estados Unidos ket para kadagiti nagduduma nga internasional a programa.
Ti U.S. Agency for International Development ti kangrunaan a humanitarian aid agency ti Washington.
Daytoy ti kangrunaan a puntiria ti gobierno a makessaayan a programa nga indauluan ti bilionario ken kaalyado ni Trump a ni Elon Musk sipud idi nagtugaw ti presidente ti Republikano idi Enero 20.
Maipalagip nga itay laeng nabiit, nangipaulog ti U.S. State Department ti pammilin nga “stop-work” para kadagiti amin a foreign assistance programs.