BAGUIO CITY – Imbilin ni Mayor Benjamin Magalong ti pananglapped dagiti otoridad kadagiti gang-related conflicts nga agpangpangta a maisubli ditoy siudad.
Kinuna met ni outgoing Baguio City Police Office director, PCol. Allen Rae Co a makitaripnongda kadagiti amin a maseknan nga ahensia ti gobyerno, panakabagi ti linteg, ti akademya ken kadagiti mismo gangs.
Inlawlawagna a saan a kabaelan ti pulisya no dagitoy laeng ti mangrisut iti nasao a parikut isut gapuna a nasken ti panakitinnulong ti amin tapnu mabigbig dagiti isyu ken parikut a nasken a masolusyonan.
Iti baet daytoy, dinakamatna nga awan met ti panagngato iti insidente ti gang war iti siudad ken dagiti naawatda a report ket isolated cases laeng.
Sigun pay kenkuana, gapu iti kaawan ti face-to-face classes ket rumwar dagiti agtutubo, nangruna dagiti saan a sakop ti restrictions ken agkukuyog dagitoy.
Impettengna a kasapulan ti panagbantay dagiti nagannak kadagiti annakda tapnu maliklikan dagiti nasao nga insidente.
Nainget metten a mabambantayan dagiti disso iti siudad a kadawyan a pagturturongan dagiti gangs.
Maipalagip a timmaud ti nasao a pakaseknan kalpasan a nagviral iti lokalidad ti video ti panagdinnangran dagiti agtutubo iti maysa a kalsada ditoy siudad.
