BAGUIO CITY – Mangnamnama dagiti petitioners a patgan ti korte ti kiddawda a 20 nga aldaw nga “effectivity” ti maikadua a Temporary Restraining Order (TRO) a kiniddawda tapnu saan pay nga agtugaw ni tribal leader Roger Sinot kas Indigenous Peoples Mandatory Representative (IPMR) ti Baguio City.
Sigun kenni Atty. Jimboy Atonen, maysa kadagiti nangipila iti TRO, agpaso ita nga aldaw ti umuna a TRO ni Sinot nga immunan nga impaulog ti Korte idi napalabas a lawas.
Kinunana nga iti kanito a mapatgan ti 20-day TRO ket ket maangay ti preliminary hearing iti impilada a petisyon ken TRO kontra kenni Sinot inton Pedrero 2.
Dinakamatna nga iti uneg ti nasao nga aldaw, saan pay a makatugaw ni Sinot kas IPMR iti lokal a konseho ti Baguio City agingga a marisot ti isyu.
Linawlawaganna met nga iti kanito a pabor kenni Sinot ti desisyon ti korte ket nawaya ti tribal leader nga agtugaw iti posisyon daytoy.
Impettengna pay a saan a personal ken saan a politically-motivated ti panangipilada iti kaso kontra iti nasao a personalidad ngem kinunana a nasken met a maikari iti posisyon dagiti agtugaw nga opisyal ken awan ti sungsungbatan dagitoy nga isyu iti kwalipikasyon.
