Nainget a binabalaw ni Department of National Defense Secretary Gilberto “Gibo” Teodoro Jr. ti panangpadayaw ni Sen. Robin Padilla kenni Chinese Ambassador to the Philippines Jing Quan, iti tengnga ti tensyon iti nagbaetan ti Pilipinas ken China.
Kinuwestionaran ni Teodoro ti positibo a panangiladawan ni Padilla iti ambassador kabayatan iti maysa a summit.
Sigun kenni Teodoro, saan a rumbeng a padayawan ti ambassador ken impettengna a rumbeng kuma a maiyunay-unay ti national interest iti pannakisango dagiti opisyal ti pagilian kadagiti masabsabatda nga opisyal ti dadduma a pagilian.
Maipalagip nga inladawan ni Padilla ni Jing kas edukado ken ‘straightforward’ nga agsao kabayatan iti personal a panagsaritaka iti ASEAN-Chinese Business Leaders Summit itay nabiit.
Agtaltalinaed iti tensyon iti nagbaetan ti Pilipinas ken China a nagramot iti insawang ti ambassador a mapapati a pangta iti panagaramat iti kinaranggas tapno agballigida iti panangala iti West Philippine Sea.
