BAGUIO CITY – Agtultuloy ti imbestigasion ti Commission on Human Rights (CHR)-Cordillera iti pannakapapatay ti maysa a sigud a kapitan ti barangay sadiay Tukucan, Tinoc, Ifugao.
Iti interbyu ti Bombo Radyo ken ni Atty. Rommel Daguimol, regional director ti CHR-Cordillera, kinunana a nangipatulod ti komision iti action team a mangsukimat iti kaso.
Dinakamatna nga ibilbilang ti CHR kas makapaalarma ti pammapatay gapu ta maatap nga aramid daytoy dagiti kameng ti New Peoples Army.
Kinunana a no maduktalan no asino dagiti nangpapatay ken ni Joseph Calabson ket mabalin a tumulong ti CHR a mangipila iti kaso kontra kadagiti suspek.
Impeksa ni Daguimol ti nainget a panangkondenar ti komision iti napasamak a pammapatay.
Impettengna nga amin a tao ket addaan iti karbengan nga agbiag ken aniaman ti naaramid daytoy ket nasken a maipaay kenkuana ti karbenganna iti maaw-awagan a “due process”.
Maipalagip a sinerrek dagiti maatap a kameng ti NPA ti balay ti biktima ken pinalpaltuganna daytoy a nagresulta iti pannakatayna.
