Pinalagipan ti Philippine National Police (PNP) dagiti gangganaet a sumarsarungkar iti Pilipinas nga agtulnog dagitoy iti paglintegan.
Daytoy ket kasaruno ti panakaarestar ti Russian content creator a ni Nikita Chekhov gapu iti panagpangtana nga agiwaras iti human immunodeficiency virus (HIV) iti pagilian.
Iti ngamin impablaak ni nasao a content creator, makita a nagvideo daytoy bayat nga adda iti Bonifacio High Street(BGC) idiay Taguig City nu sadino, dinakamatna dagiti nasao a balikas a nakaalarma kadagiti netizen.
Gapu iti dayta, inarestar daytoy dagiti otoridad ken kalpasan a naipasidong iti test ket nakumpirmar a negatibo daytoy iti nasao a sakit.
Nupay kasta, mapalpalagipan latta ti publiko kadagiti makalanglangen dagitoy nangruna ket naobserbaran ti panagngato ti kaso ti HIV iti pagilian.
Sigun iti kapulisan, seryoso dagitoy a mangiyim-implimintar kadagiti paglintegan ti pagilian nu sadino,impeksada a determinadoda a pagnakmen dagiti saan a mangraem saan laeng nga iti paglintegan ti pagilian nu di ket uray iti kultura ken kadagiti umili.
Iti agdama, agtaltalinaed a nakabalud ni Chekov iti detention facility iti Bureau of Immigration(BI) bayat a maur-uray ti panakaideport daytoy.
