![](https://img.bomboradyo.com/baguio/2021/04/BUSOL-DEMOLITION.jpg)
BAGUIO CITY – Kidkiddawen ti lokal a konseho ti Baguio ti panangrepaso wenno panangadal manen ni Mayor Benjamin Magalong kadagiti saan a naimplementar a demolition orders a naipaulog kadagiti nagipatakder ti balay iti masakupan ti Busol Forest Reservation.
Maipalagip a 16 nga istruktura ti naipaulogan ti demolition orders ngem 11 kadagitoy ti saan a naipatungpal gapu iti temporary restraining orders (TROs) nga impaulog ti korte bayat a tallo ti narakrak ti demolition team ti siudad, maysa ti narugian a narakrak ken maysa ti rinakrak ti mismo nga agtagikua.
Naamuan a nagpason dagiti TROs ngem awan pay ti naituding nga aldaw iti panakaituloy ti panagrakrak kadagitoy.
Nagramot ti panakaipaulog ti demolition orders iti naduktalan a panaglabsing dagiti maseknan iti tulaganda iti lokal a gobyerno nga awan ti aniaman a konstruksion wenno aniaman a development iti nasao a disso.
Nupay kasta, nangngeddeng ti lokal a konseho ti Baguio nga iyapela kenni Mayor Magalong ti panakaikonsidera dagiti panagbaliw nga inaramid dagiti maseknan nga umili tapnu mapatibker ken maisimpa ti pagtaengan dagitoy.
Nupay inkalintegan dagiti maseknan a dagiti inaramidda a panagbaliw iti impatakderda nga istruktura ket para iti panakaisimpa ti pagtaenganda, inaklonda met a nasken a nagkiddawda iti pammalubos manipud iti ama ti siudad.