Temporaryo nga insardeng dagiti otoridad itay laeng malem ti panangsapulda iti 16-anyos a lalaki a mapapati a nalmes idiay Mamaga, Balili, La Trinidad, Benguet gapu iti saan a nasayaat a paniempo.
Iti interview ti Bombo Radyo kenni La Trinidad Mayor Romeo Salda, naireport kadagiti otoridad ti mapapati nga insidente ti pannakalmes idi pay Setyembre a uno, pasado alas kwatro ti malem.
Nupay kasta, dinakamat ni Mayor Salda a saan a nalawag ti salaysay dagiti innem a kakadwa ti biktima nu anya ti husto a napasamak gapu ta saan nga agtutunos ti ibagbaga dagitoy.
Ibagbaga dagiti dadduma a limmagto wenno nagdive ti biktima, ibagbaga met dagiti dadduma a dandani tallo dagiti malmes ngem nakalasat dagiti dua bayat a saan met a maibaga dagiti dadduma ti sibubukkel a napasamak agsipud ta maatap a nakainom dagitoy idi napasamak ti insidente.
Naammoan ngamin iti imbestigasyon a nag-iinom ti biktima ken dagiti kakadwana kas panangrambakda iti panagkasangay ti maysa a kadwada.
Sigun met kenni Mayor Salda, imbilinna ti naing-inget nga imbestigasion tapno maammoan ti pundo a napasamak bayat nga agtultuloy ti panangsapulda iti biktima agsipud tallon nga aldaw a mapukpukaw daytoy.
Maipalagip nga idi napalpalabas a tawen ket adda metlaeng ti nalmes iti nasao a karayan wenno creek a nangitunda iti ipupusayna.
