BAGUIO CITY – Kidkiddawen ti baro a dadaulo ti Police Regional Office – Cordillera ti panangituloy dagiti umili iti rehion iti panangsuportarda kadagiti programa ti pulisya ti Cordillera.
Iti panakiyuman ti Bombo Radyo kenni PCSupt. Rolando Nana, kinunana a no adda man ti pagbiddutan dagiti pulis iti rehion ket ipaay dagiti umili ti panangpasensia kadagitoy.
Nupay kasta, kinunana a nasken met a maidanun iti opisinana dagiti nasao a biddut wenno maikaniwas nga aramid para iti panakaipaay ti kaskenan nga aksion.
Kabayatanna, impeksa ti maika-37 a Regional Director ti Cordillera PNP ti kinaragsakna iti panakaisublina manen ditoy rehion Cordillera.
Immunan a naipadamag a ni Nana ket dimmakkel ditoy siudad ti Baguio, miembro ti Philippine Military Academy Class of 1985 ken nagserbi pay a provincial director ti Apayao PNP.
Sinukatanna ni PCSupt. Edward Carranza nga ita ket naiyakar sadiay CALABARZON.
