BAGUIO CITY – Nangisayangkat iti misa ken ritwal dagiti residente iti lower downstream communities ti Itogon, Benguet tapnu kiddawen ti proteksion para iti nakaparsuaan.
Mainaig paylaeng daytoy iti panagtubngarda iti plano ti Benguet Corporation a panakaipangato ti tailings dam 2 ti kompanya.
Iti met interview ti Bombo Radyo Baguio kenni Benguet Board Member Alexander Fianza manipud Itogon, kinunana a nagtaripnong dagiti abogado iti lower downstream communities ti munisipyo para iti panagaramidda iti umno a papeles a maipila iti maseknan nga ahensia ti gobyerno para iti panakaipasardeng ti nasao a plano ti kompanya ti minas.
Kinunana a natibker ti takder dagiti apektado nga umili a saanda nga ipalubos ti panakaituloy ti plano ken saanda nga umanamong iti aniaman a negosasyon iti nagbaetanda ken ti kompanya.
Impannakkelna met a natalinaay ti panagbarikada dagiti umili iti asideg ti tailings dam 2 ti kompanya ken agingga ita ket awan met ti lugan ti kompanya a nanggandat a mangiserrek manen iti kagawaan para iti panakaituloy ti proyekto.
