Aklonen ni Engr. Bonifacio Dela Peña, City Administrator iti siudad a saan unay a maik-ikkan importansya dagiti visually impaired people weno dagiti bulag.
Daytoy ket kalpasan nga impakaamo ti Bombo Radyo ti arungaing dagiti bulag kenkuana nga iti laksid a nakapasa dagitoy kadagiti nagduduma nga eksaminasyon wenno nakaturposda iti panagadal ket kasla saan dagitoy a mapanpansin ti gobyerno.
Gapu iti dayta, kinuna ni Dela Peña a pagsasaritaanda daytoy kadagiti nagduduma nga ahensiya no kasanu a matulungan dagiti bulag wenno dagiti amin a “differently abled” tapno saanda nga agpalpalimos kadagiti aglawlaw iti siudad ti Baguio.
Maibasar iti mensahe iti maysa a bulag, tarigagayda iti maaddaan met iti trabaho ngem marigatan dagitoy a makastrek iti trabaho rason nga uray saanda a kayat ket agpalpalimosda.
Impakaamo met ti City Administrator nga addan ti panggep a panagtulong kadagitoy kas iti panakaipaay iti espasyo iti maibangon nga intermodal terminal sadiay Dontogan kadagiti bulag a mabalin a pangipangtungpalanda iti negosyoda kasta met a maadal pay dagiti daduma a banag no kasano a matulungan dagitoy.
