BAGUIO CITY – Agkurkurang ti pondo para iti financial assistance a maipapaay kadagiti rebelde a sumuksuko iti gobyerno.
Inaklon daytoy ni Department of the Interior and Local Government (DILG)-Cordillera Regional Director Araceli San Jose iti panakiuman ti Bombo Radyo Baguio kenkuana.
Imbinglayna nga idi pay napalabas a bulan ti Mayo ket naibusen ti pondo ti DILG para iti nasao a tulong.
Nupay kasta, impettengna nga ikagkagumaan ita ti DILG-Cordillera nga agbiruk ti pamuspusan tapnu makaalada ti pondo manipud iti DILG Central Office.
Dinakamatna a dumanon iti 28 a rebel returnee ti naipaayanen ti tulong pinansial manipud iti P3.6-M a pondo idi napalabas a tawen bayat a 35 a rebel returnee ita a tawen.
Mangnamnama met ni Director San Jose nga ad-ado pay a rebelde ti sumuko wenno agsubli iti sidong ti gobyerno kagiddan ti panagsalukagda nga agbiruk met ti pondo tapno matulongan dagitoy a mangabaruanan.
