Idagdagadag manen ti Cordillera Disaster Risk Reduction and Management Council (CDRRMC) kadagiti local government units (LGUs) iti rehion nga aramatenda ti disaster funds partikular ti paset a nailatang para iti panagsagana ken ‘resilience.’
Daytoy ket sigun kenni CDRRMC Chairperson ken Office of Civil Defense–Cordillera (OCD-CAR) Regional Director Albert Mogol.
Kinunana a maibasar iti datos manipod iti Bureau of Local Government Finance (BLGF), kaadduan nga Local Government Units ket saanda nga ar-aramaten dagiti disaster risk reduction and management (DRRM) fund dagitoy.
Ita a tawen, dumanon iti P837 milion ti napagtitipon a pondo ti DRRM iti rehion.
Sigun kenkuana, nababa ti disbursement rate iti rehion nu idilig kadagiti dadduma a rehion.
Iti sidong ti linteg, 70 a porsiento ti pondo ti DRRM ti naituding para kadagiti panagregget iti panagsagana ken resilience kas iti panagsanay, hazard mitigation, ken panaggatang kadagiti alikamen bayat a 30% ti nailatang kas Quick Response Fund (QRF) para kadagiti kasapulan iti emerhensia bayat ti didigra.
Sipud idi Marso 31, maimatangan iti rekord ti Bureau of Local Government Finance a zero percent disbursement dagiti LGUs iti Cordillera para iti 30% nga Quick Response Fund portion.
Para met iti 70% a nairanta iti panagsagana ken resilience, 6.9% laeng ti nagastos.
Impaganetget ni Mogol ti panagaramat iti pondo para kadagiti proactive measures.
Imbalakadna pay a dagiti saan a maaramat a pondo ti DRRM iti uneg ti lima a tawen ket mailatang iti dadduma a panggep, kas kadagiti proyekto ti imprastruktura.
Guyguyuguyenna ti panagtinnulong dagiti nagduduma nga ahensia a kas ti BLGF, Department of Interior and Local Government (DILG) and OCD tapno maipasigurado ti nasayaat a pannakaramat ti pondo.