Awan pay iti maibilang a narco-politician iti Rehion Cordillera iti agdama sigun iti Philippine Drug Enforcement Agency-Cordillera.
Iti panakiuman ti Bombo Radyo kenni Rosel Sarmiento, Information Officer iti Philippine Drug Enforcement Agency-Cordillera, manarimaan paylaeng ti panangvalidate dagitoy kadagiti narco-politics a karaman iti narcolist ti naglabas nga administrasyon.
Iti sabali a bangir, agtaltalinaed a ti shabu(methamphetamine) ken marijuana ti kangrunaan a makumkumpiskar kadagiti makemkemmeg a drug personalities iti rehion.
Sigun kenni Sarmiento, naobserbaranda nga adda dagiti marijuana a kusa nga agtubtubo ngem impettengna nga ad-adu dagiti maigaggagara a maimulmula.
Gapu iti dayta, nangbukel dagitoy iti Technical Working Groups a mangmonitor kadagitoy.
Malaksid iti dayta, activated metten dagiti Barangay Anti-Drug Abuse Council (BADAC) a mabalin a makaipaay iti impormasyon kadagiti otoridad seknan iti marijuana plantation sites, ken kadagiti dumaydayo a mapagduduaan a mabalin a mangipuslit wenno gumatang iti droga.
Kabayatanna, naobserbaran a marijuana tubular form ti kadawyan a makumkumpiskar iti agdama.
Sigun kenni Sarmiento, dagiti maiyulog a marijuana manipod kadagiti kabanbantayan ket nakadepende iti kiddaw wenno demand dagiti buyer.
Nupay kasta, saan pay a naduktalan ti rason nu apay a tubular form ti kadawyan a kidkiddawen dagitoy iti agdama.//Bombo Rob Dominguez
