BAGUIO CITY- Kiniddaw ti maysa a kandidato para kagawad iti maysa a barangay ditoy siudad ti Baguio ti panagaksion ti Commission on Elections (Comelec)-Baguio kontra ti maatap a presensiya dagiti fixers iti nasao nga opisina.
Nagreklamo iti istasion ti Bombo Radyo-Baguio ti nasao nga indibidual kalpasan a dagiti guardiya ti Comelec-Baguio ti nagilako kenkuana iti documentary stamps ken dagiti met laeng guardia ti nangirekomendar kenkuana ti pag-panotaryoan daytoy iti impilana a Certificate of Candidacy (COC) idi Sabado ti malem.
Inyestoryana nga idi damo ket binalakadan daytoy ti guardia ti Comelec a gumatang iti documentary stamp iti ruar ti Comelec ngem gapu ta awan ti nagatangna iti ruar ket nagsubli daytoy iti opisina ti Comelec-Baguio.
Kinunana nga iti panagsublina ket kinasarita ti guardiya ti maysa nga empleado ti Comelec ken linakuanda daytoy iti dua a documentary stamps.
Kalpasanna ket inrekomendar ti guardiya ti panagpanotaryona iti kadwa dagitoy a maysa a tomboy nga adda iti uneg ti guard house.
Kinunana nga idi damo ket P250 ti imbaga ti guardiya a bayad iti notorio ngem nagbalin daytoy a P200 kalpasan a nagkiddaw daytoy iti diskwento.
Impetteng ti nasao nga indibidual a nasken a maaksionan ti nasao a banag gapu ta atapenna a dakkel a gatad ti naur-or dagiti nagkokomplot iti pannakailako ti documentary stamps ken panagnotaryo iti uneg a mismo ti compound ti Comelec-Baguio no daytoy ket naipatungpal manipud pay nangrugi ti COC filing.
Kabayatanna, impetteng met ni Election Officer Atty. John Paul Martin a saan nga empleado ti Comelec-Baguio dagiti maatap a nangilako iti documentary stamps ken nagnotaryo iti maysa a kandidato a nagreklamo iti Bombo Radyo-Baguio.
Inlawlawag ni Atty. Martin a sakbay pay a nagrugi ti panagpipila iti Certificate of Candidacy (COC) para iti masungad nga eleksion ket nagaramid daytoy iti pagalagadan a mangipawpawil iti pannakipaset dagiti empleado ti Comelec iti panaglako iti documentary stamps ken panagpanotaryo.
Kinunana nga amin dagiti aktibidad nga addaan iti mabayadan kas iti panagpaala iti ladawan, panagpa-xerox, panagikabil iti documentary stamps ken panagpanotaryo ket nasken a maipatungpal iti ruar ti Comelec tapno ti laengen awaten ti opisina ket dagiti kompleto a dokumento.
Kinunana a daytoy ket maisupadi launay iti reklamo ti nasao a kandidato a dagiti empleado ti Comelec ti nangilako kenkuana iti documentary stamps ken iti uneg ti compound ti opisina ti nagpanotaryoan daytoy.
Iti baet daytoy, kinuna ni Atty. Martin a nakasagana daytoy a mangimbestigar iti nasao a banag la ketdi agkamang kenkuana ti nagreklamo.
Inaklon ti opisial nga immunan a nakaawat daytoy iti kapada a reklamo manipud iti sabali pay a kandidato mainaig met laeng iti panaglako iti documentary stamps ken panagpanotaryo iti uneg ti compound ti Comelec-Baguio.
