Naiyuswaten ti Indigenous Peoples Month Celebration Barangay Irisan Baguio City itay nabiit.
Sigun kenni Councilor Rocky Aliping, Presidente ti LIGA ng mga barangay adda dagiti bukod nga aktibidad dagiti babarangay para ti nasao a selebrasyon.
Impeksa pay daytoy a mannarimaan ti Information Education Campaign dagitoy kadagiti babarangay nangruna ti panangpili kadagiti Indigenous Peoples’ Mandatory Representative (IPMR) kada barangay no sadinno paset metlaeng daytoy ti panagsagana para ti merging dagiti babarangay.
Imbinglay ni Aliping a nasken nga amin a barangay ket addaan ti IPMR nu mapasamak ti merging. Mainaig ti dayta, nanayunan ti bilang dagiti barangay a kabaelanna a tumakder nga agmaymaysa maibasar iti threshold dagitoy.
Iti kaudian a datos nga imbinglay ti opisyal, manipud iti 33 a barangay a posible a pagbalinan ti syudad ti Baguio, nagbalinen daytoy 48-49 a barangay.
Inyunay -unay ti opisyal a nasken a maipatungpal ti barangay merging sakbay kuma a malpas ti termino dagitoy ket maimplementar ti nasao a panggep.
Sigun pay kenni Aliping, naipaayanda iti nawadwad nga oras a mangisagana ti final proposal, sakbay a maipaay daytoy iti council tapnu mapagbalin nga ordinansa sakbay a maipatungpal ti plebiscite.
