BAGUIO CITY-Pagan-annaden ni Association of Barangay Council (ABC) President ken Councilor Michael Lawana ti publiko nangruna dagiti barangay officials kontra kadagiti agpampammarang nga empleado ti gobierno a mangiproseso kadagiti madutukan nga agbalin nga opisial dagiti babbarangay.
Impetteng ti konsehal nga awan pay ti pinal a bersion iti panggep a pannakaitantan ti Barangay ken SK Elections isut gapuna a saan pay a nalawag no mangdutok ni Presidente Rodrigo Duterte kadagiti agserbi nga opisial dagiti babbarangay wenno saan.
Dinakamat ni Lawana nga adda dagiti agturturong kadagiti babbarangay ken ar-aramatenda ti nagan ti presidente ken dagiti secretary ti gabinete.
Kinunana a dagiti nasao nga indibidual ket agkiddaw iti bio-data dagiti interesado nga agbalin nga opisial ti barangay ken agdawatda kadagitoy iti processing fee.
Impetteng ti konsehal nga scam ti nasao a banag ken masapul a maireport a dagus dagitoy iti kuerpo ti pulisya wenno kadagiti opisial ti barangay.
