BAGUIO CITY- Naaprobaranen iti umuna a panagbasa iti lokal a konseho ti Baguio ti ordinansa a mangbaliw iti sumagmamano a probisyon ti City Ordinance No. 49, series of 2021 wenno ti Face Mask and Face Shield Ordinance of 2021 ti siudad.
Partikular a mabaliwan ti probisyon iti inkapilitan a panagisuot ti face shield iti ruar ti pagtaengan.
Sigun kenni Councilor Joel Alangsab, chairperson ti Committee on Health iti City Council, iti maisaksakad a baro nga ordinansa ket mapagbalin a boluntaryo laengen ti panagaramat ti face shield kadagiti open spaces ditoy siudad.
Nupay kasta, agtalinaed a kasapulan ti panagsuot ti face shield kadagiti closed setting kas kadagiti ospital, quarantine areas, isolation facilities, triage areas ken dadduma pay.
Maiparang manen ti ordinansa iti sesyon ti lokal a konseho inton Lunes para iti maikadua a panagbasa.
Immuna metten nga inwaragawag ti LTFRB-Cordillera a boluntaryo laengen ti panagaramat ti face shield kadagiti parapubliko a lugan.
