Baguio City- Nangipaay ti ultimatum wenno deadline ni Mayor Benjamin Magalong ti maysa lawas kadagiti mangbukbukel iti City Sports and Development Office tapno maaramat ken mapasilawan dagiti uppat a light towers ti Baguio Athletic Bowl.
Impaulog daytoy a derektiba ni Magalong iti naisayangkat a konsultasyon kadagiti sports stakeholders partikular dagiti coaches, athletes, ken parents idiay City Hall itay nabiit.
Sigun kenkuana a tallo a tawenen ti napalabas manipud naipasdek ti nasao a pasilidad a napunduan ti mano a milyon a pesos ngem agingga iti agdama ket saan pay a naar-aramat.
Nairuar ti nasao a pakaseknan kagiddan iti pannakairekep ti Baguio Athletic Bowl iti alas singko ti malem tunggal aldaw nu sadino awan ti gundaway a maka-ensayo ken makaay-ayam dagiti atleta ken ti publiko nangruna nu rabii.
Gapu iti daytoy ket nagkari ni Honorio Yamoyam, ti kabarbaro a mangidadaulo iti City Sports Office nga aramiden da amin a kabaelan da tapno agtulnog iti nasao a pammilin ti Mayors Office. // Bombo Jordan Tablac
