Maur-uray paylaeng a maaprobaran ti singasing a pannakaipaay iti Financial Incentives kadagiti top board ken bar passers iti siudad ti Baguio.
Iti interview ti Bombo Radyo kenni Baguio City Councilor Elmer Datuin, kinunana a dakkel daytoy a tulong para paylaeng kadagiti top notchers partikular iti financial a pagkasapulan.
Sigun kenkuana insingasingda daytoy nga ordinansa agsipud ta kasapulan met a maipaayan dagitoy iti financial rewards tapno adda ti paggagagetanda.
Mang-encourage pay daytoy tapno ad-adda a lallaingen dagitoy nga agreview sakbay ti examinasyon ken tapno adda a maragsakanda.
Impettengna nga uray bassit daytoy a gatad ket dakkel latta daytoy a tulong partikular metlaeng kadagiti awanan iti financial a pagkasapulan.
Nupay kasta, dagiti laeng agnumar iti daytoy ket dagiti laeng topnotchers iti nasao nga eksaminasyon a residente iti siudad ti Baguio.
Iti kanito a maaprobaran ti nasao nga ordinansa dagiti kasapulan nga isumitir dagiti topnotchers ket ti dokumento a mangpaneknek iti pagadalan a nagskwelaan dagitoy, birth certificate, certification idiay ranking wenno skorna ken dadduma pay.
Gapu iti daytoy, maen-encourage dagiti estudyante a lallaingen ken saysayaatenda nga agiskwela ken agreview tapno makaawatda iti daytoy iti kanito a maaprobaran.
