Kinumpirmar ti Philippine Embassy idiay Abu Dhabi ti pannakaarestar ti dua nga Overseas Filipino Workers (OFWs) nga immunan a naipadamag a naarestar gapu iti maatap a panangipablaak dagitoy iti video ti missile attack wenno panagatake sadiay.
Saan pay laeng nga impablaak ti nasao nga embahada dagiti nagan dagitoy ngem dinakamatda a naipakaammon ti sitwasyon dagitoy kadagiti pamilyada iti Pilipinas.
Impakaammo pay ti embahada a nangipaayda meten ti legal assistance kadagiti dua babaen iti legal counsel ti embahada.
“Legal assistance is being extended to the arrested through the embassy’s retained legal counsel,” sigun iti statement ti Philippine Embassy idiay Abu Dhabi.
Nagkiddawda meten iti otoridad ti United Arab Emirates ti gundaway a mabisita dagiti naarestar a Pilipino.
“A request has been submitted to the relevant UAE authorities for a consular visit to the arrested nationals, subject to approval by the competent authorities,” innayon daytoy.
Iti agdama, ururayenda pay laeng ti sungbat ti gobyerno ti United Arab Emirates seknan iti nasao a kiddaw. // Bombo Karen Sapirao
