BAGUIO CITY- Nagsurat ni mayor benjamin magalong iti Inter-Agency Task Force (IATF) tapno kiddwenna ti panakabaliw ti agdama a klasipikasyon ti quarantine iti Baguio City.
Maipalagip a naipasidong ti siyudad ti Baguio iti General Community Quarantine iti entero a bulan ti Marso.
Iti interview ti Bombo Radyo Baguio, kinuna ni Mayor Benjamin Magalong a rumbeng a maipasidong ti siyudad iti Modified GCQ.
Inlawlawagna a daytoy ket agsipud ta nababa ti daily attack rate, nangato ti COVID-19 testing ken nababa ti health care utilization rate ti siudad a rason a temporaryo a naisardeng ti operasyon ti tallo nga isolation facilities ti Baguio.
Sigun kenkuana, low risk ita ti Baguio City seknan iti COVID-19.
Dinakamatna pay a nagaramidda iti analytics nga impatulodda iti IATF ken iti Department of Health para iti panakaikonsidera ti kiddawna a mapagbalin a Modified GCQ ti status ti Baguio.
Mangnamnama ti mayor a maaprobaran ti kiddawna tapno in-inoten a mapalukayan dagiti pagalagadan kontra iti COVID-19 a maipatpatungpal ditoy siudad.
