BAGUIO CITY- Tarigagay ti lokal a gobyerno a maideklara kas drug free dagiti amin a barangay iti Baguio City.
Sigun kenni Benjamin Macadangdang, Executive Assistant For Barangay Affairs, sangapulo ket uppat laeng a barangay iti siudad ti agtaltalinaed nga apektado iti iligal a droga.
Kinunana nga indikasyon daytoy a napigsa ti kampanya ti siudad kontra iti iligal a droga gaputa bumasbassit metten ti agar-aramat iti daytoy.
Impettengna nga agtultuloy ti panangrepaso ti lokal a gobyerno kadagiti estratehiya dagitoy tapno maparmek ti iligal a droga iti siudad.
Inayonna nga ikagkagumaanda a suroan dagiti agtutubo iti umno value system tapno ad-adda a maguyogoy dagitoy nga agbalin a responsable ken produktibo iti komunidad.
Impaganetget ni Macadangdang a pappapigsaen ti Barangay Anti-Drug Abuse Council (BADAC) ti implementasyon dagiti anti-drug measures ken ti panangbantayda iti komunidad kontra kadagiti agilaklako ken agiwarwaras iti iligal a droga.
