Impasigurado ni Ukrainian President Volodomyr Zelenskyy ita nga aldaw a mangilukat ti embahada ti Ukraine ditoy Pilipinas ita a tawen.
Daytoy ket bayat ti panagtaripnongda kenni President Ferdinand ”Bongbong” Marcos Jr. idiay Malakanyang.
Simmangpet ti dadaulo ti Ukraine idi laeng kalman ti rabii nu sadinno pinagyamananna ni President Marcos Jr iti suporta nga ipapaay ti Pilipinas iti baet ti agtultuloy a panagsusupiat dagitoy iti Russia.
Immunan nga impeksa ni Zelensky ti intensionna a mapapigsa wenno mapauneg pay ti kooperasionda iti Pilipinas.
Maipalagip a nangiyuswat ti Russia iti “full-scale invasion” kontra iti Ukraine idi Pebrero 24, 2022 ken inawagan daytoy ni President Vladimir Putin nga “special military operation” tapno ma-“de-Nazify” ti pagilian.
Sigun iti United Nations, nagresulta iti nakaro a pannakadadael ti panag-atake ti Russia iti Ukraine nu sadinno, minilmilyun ti agsagsagaba.
Kabayatanna, ti “diplomatic relations” iti nagbaetan ti Pilipinas ken Ukraine ket naipasdek idi Abril a siete, 1992.
Aktibo nga agtintinnulong iti dua a pagilian nangruna iti United Nations.
