Impanamnama ti gobierno ti Japan a mangipaayda ti P84 billion a gatad ti proyekto ti Pilipinas agingga ti rugi ti sumaruno a tawen.
Sigun iti Department of Finance, agarup 227.6 bilyon Japanese yen wenno P83.9 bilyon a gatad dagiti proyekto ti “pipeline projects” ti Japan International Cooperation Agency (JICA), ita a tawen agingga inton 2025.
Kasaruno ti panagkinnita ken panagsarita ti Department of Finance International Finance Group iti JICA director general ti Southeast Asia ken ti departamento ti Pacifico a ni Hayakawa Yuho itay nabiit.
Inkari pay ti Japan ti panag-execute ti tinawen nga “average pipeline” ti agarup 249.2 billion Japanese yen wenno agarup P92.18 billion agingga inton tawen 2017.
Naituding pay ti pannakapirma ti uppat a “loan agreements” sakbay nga agleppas iti agdama a tawen.
Ti mapirmaan ket maipapan iti proyekto ti “maritime safety”, dalan, ken “ flood risk management”.
Malaksid iti dayta, ad-adalen pay ti bilateral aid agency ti panangpalawa kadagiti dadduma a sektor a kas ti agrikultura, edukasion ken “health”, a karaman iti panggep ti agdama nga administrasion a panagpadur-as.
Ti Japan ket kadakkelan nga official development assistance (ODA) partner ti pagilian nga addaan ti $12.3 bilion a “net commitments” ti “loans” ken “grants” manipod iti ngudo ti 2023.
Daytoy ket 33 porsiento iti dagup nga ODA ti Pilipinas.
