BAGUIO CITY – Iyap-apela manen dagiti miembro ti Baguio Pailaw Association ti panakaipalubos ti panaglako dagitoy para iti panagrambak iti Baro a Tawen.
Iti panakiuman ti Bombo Radyo Baguio kenni Agnes Montoya, panakabagi ti nasao a grupo, dinakamatna a naawatdan ti permit dagitoy manipud iti PNP National Headquarters a mangipalpalubos iti panaglakoda kadagiti legal a pailaw ken paputok.
Dinakamatna a ti kidkiddawen dagiti 10 a miembro ti grupoda ket ti dua agingga tallo laeng nga aldaw a panaglako kadagiti pailaw.
Sigun kenkuana, agsuratda manen iti mayor ti Tuba, Benguet tapnu mapalubusanda nga aglako iti sigud a pagpupwestuan dagitoy manipud napawilanda nga aglako iti masakupan ti Baguio City.
Nupay adda dagiti paputok a mabalin nga ilakoda kas maibasar iti Republic Act 7183, inyunay-unay ni Montoya a dagiti laeng pailaw wenno dagiti maipatpatayab iti tangatang nga agpapataud ti nagduduma a maris ken dagiti sparklers wenno magic wand ti ilaklako dagitoy.
