Iyap-apela manen ni Alliance of Concerned Teachers Party-list Representative France Castro iti kongreso ti pannakaipangato ti sweldo dagiti mannursuro.
Kasaruno daytoy ti panangpirma ni President Ferdinand Marcos Jr. iti P10,000 nga allowance dagiti mannursuro tunggal tawen manipud iti sigud a P5,000.
Sigun kenni Castro, nabayagen a saan a pinagan-ano dagiti mammanday-linteg ti kiddaw a pannakaipangato ti sweldo dagiti mannursuro.
Dinakamat ni Castro a rumbeng laeng a maipangato iti P50,000 ti basic salary dagiti mannursuro.
Impettengna pay a saan a patas nu dagiti laeng opisyales ti Bangko Sentral ng Pilipinas ti agnumnumar iti nangato unay a sweldo bayat a dagiti mannursuro ket an-anusanda ti nababa a sweldo.
Immunan nga irekreklamo dagiti sumagmamano a mannursuro ti panang-aramatda iti bukkodda a sweldo a panggatang kadagiti school supplies.
