Imbinglay ni Baguio Councilor Edison Bilog nga isingsingasing ita ti Committee on Laws ti Baguio City Council a maipangato ti minimum legal drinking age iti siudad.
Iti pannakiuman ti Bombo Radyo kenni Councilor Bilog, ti nasao a singasing ket panggepna nga amyendaran ti agdama a Liquor Code of the City of Baguio
Sigun kenni Councilor Bilog, panggep ti nasao a gakat nga ingato ti nasao nga edad iti 23 manipud iti 18.
Imbinglay ni Councilor Bilog a kayat dagiti miyembro ti Committee on Laws ti nasao nga edad gapu ta nakitada a makaapapektar iti development dagiti agtutubo iti siudad ti panaginomda iti arak iti nasapa nga edad.
Malaksid iti dayta, impetteng ti konsehal a kadawyan gamin a rason ti sumagmamano nga insidente kas iti vehicular accidents ken gulo iti siudad ket gapu iti kaadda dagiti maseknan nga indibidual iti impluwesya ti arak.
Nupay kasta, imbinglay ni Councilor Bilog a kas adaddalenna ti nasao a gakat, awan pay laeng ti datos a mangsuporta kadagitoy a claims.
Innayonna pay a maysa kadagiti kitkitaenda a mabalin a negatibo nga epekto daytoy ket posible a mangsarak dagiti dadduma nga agtutubo iti dadduma a paginomanda iti sabali a lugar, banag a mabalin a mangrengulate iti linteg.
Maysa pay kadagiti ikonkonsiderada ket iti kanito gamin a maipasa ti nasao a linteg, posible a maaddaan iti criminal records dagiti makemmeg a manglabsing iti daytoy no sadino impetteng ni Councilor Bilog a makaapektar iti masakbayanda.
Iti baet dayta, patien ni Councilor Bilog nga awan iti edad ti nasao nga isyu nu di ket iti panangpadakkel ken kagagalad dagiti agtutubo. //bombokaren.c.sapirao