BAGUIO CITY – Sinuspindir ti City Treasury Office ti implementasyon ti panakaipangato ti fees wenno renta a baybayadan dagiti market vendors tunggal rabii iti Harrison Road, Baguio City kasaruno ti apela dagiti apektado nga vendors iti timing ti nasao nga regulatory fees.
Immunan a nangipasa ti lokal a konseho iti Resolution No. 176, series of 2022, a mangkidkiddaw iti Treasury Office para iti status quo ti koleksion ti linawas nga night market fees.
Dinakamat ni City Treasurer Alex Cabarrubias kadagiti miembro ti konseho iti naudi nga session nga isubuldida ti koleksion ti P350 weekly night market fee kadagiti karaman nga vendors a nag-epektibo idi May 9, 2022 kas sungbat iti resolusyon ken apela dagiti night market vendors.
Naamoan nga idi March 14, 2022, nangrugi nga agkolektar ti siudad iti P500 nga weekly night market fee kadagiti vendor manipod iti P350 a sigud pay a makolkolektar kadagiti naglablabas a tawen.
Maibasar met iti reklamo dagiti grupo ti night market vendors a naipatulod iti lokal a gobierno, kidkiddawenda a maitantan ti panakaipangato ti market fees ken mamintinir ti P350 a makolektra kagiddan ti agtultuloy a panagrekoberda iti epekto ti COVID-19 pandemic.
Iti agdama, dumanon iti 12 ti grupo ti market vendors ti aglaklako iti operasyon ti night market ken agsisinublat ti schedule dagitoy kas paset ti implementasyon ti minimum public health standards.
