BAGUIO CITY- Nalawlawagan ti pannakaipangato iti renta kadagiti stalls wenno pwesto iti night market iti Harrison Road, Baguio City.
Iti interview ti Bombo Radyo Baguio ken Public Order and Safety Division Deputy Chief Daryll Kim Longid, kinunana a nagna amin iti umno a proseso ti desisyon a maipangato ti renta kadagitoy.
Kinunana nga adda ti insayangkatda nga konsultasyon kadagiti night market vendors babaen kadagiti block leaders dagitoy ken nagna daytoy iti pannakabukel iti resolusyon.
Kinunana a ngimmato iti 500 tunggal lawas ti abang manipod iti sigud 350 iti linawas ken napalawa pay ti sakop ti pwesto dagiti night market vendors ken maka-displayda iti lakoda a nasaysayaat.
Inkalinteganna a manageable pay ti P20 tunggal rabii wenno P150 tunggl lawas a kanayunan a mabayadan iti renta nangruna ta makasubsubbot metten dagiti vendors kasaruno iti immado a bilang dagiti agturturung iti night market sipod nangrugi nga umawat ti syudad kadagiti turista.
Kabayatanna, nanayunan ti aldaw a panag-operate dagiti night market vendors kasaruno iti napalukayan a restrictions kagiddan iti pannakaibaba ti alert level status 1 ken panag-adu dagiti turista a sumsumrek iti syudad.
Sigun pay kenni Longid, adda iti sumagmamano a panagbaliw iti operasyon ti night market nu sadinno nagbalin nga every other week iti panaglukat dagiti 440 a stall owners sadiay manipod iti sigud a maminsan iti maikatlo a lawas.
Dinakamatna a maysa a rason iti daytoy ket iti agtultuloy a bumabbaba a kaso ti COVID19 ti syudad ken nanayunan a pwersada nga agpalagip iti pannakamintinir ti health protocols.
Malaksid iti dayta, napaladaw iti panaglukat dagitoy agingga alas nuebe iti rabii agingga alas dos ti parbangon manipod iti sigud nga alas siete agingga alas dose ti parbangon.
Inlawlawagna a mariknan iti nabuntog a gunay ti trapiko iti alas siete ken alas otso ti rabii gapu iti kinaadu ita dagiti lugan nga agdaldalyasat kadagiti kalsada ti syudad isut gapu a nasken a baliwanda metlaeng iti pannakaiserra ti Harrisson Road para iti operasyon ti night market.
Kagiddan iti dayta, inpanamnamana iti nainget latta a panagwanawanda pakairamanan dagiti kameng ti pulisya para iti implementasyon ti minimum public health standards nangruna iti social distancing nga inmunan nga inaklonna a saan a maliklikan a malabsing.
