Inlawlawag ti Malacañang a saan paylaeng nga iparit ti agdama nga administrayon ti Facebook.
Iti baet dayta, maisaksakad ti nainget ken nalawag a pagannurotan ti FB para iti pannakaikkat ti online content a mangitantandudo iti disinformation ken mangparegta iti kinaranggas.
Maipalagip nga immuna a kinuna ni Palace press officer Claire Castro a silulukat ti administration iti singasing a maiparit ti Facebook ken gaming application, kasaruno ti pakaseknan iti disinformation ken ngumatngato a kaso ti school violence.
Insingasing ti Cybercrime Investigation and Coordinating Center ti pannakaiparit ti nasao a social media app, kasaruno ti shooting incident a napasamak iti Ateneo de Zamboanga.
Nupay kasta, inlawlawag ni Atty. Castro a simmungbat ti Facebook kiddaw ti gobierno a dagus a maikkat dagiti palso a damag.
Sigun kenkuana, naituding nga agturong ni Information and Communications Technology Secretary Henry Aguda sadiay Singapore para iti panagtataripnong dagitoy iti regional executives ti Meta.
Manamnama a pagsasaritaanda ti wagas tapno dagus a maikkat dagiti naranggas ken ulbod a post iti masal a social media.