BAGUIO CITY – Ipalpalagip manen dagiti otoridad ti ordinansa a mangiparparit ti panagimet ti bladed weapons kadagiti parapubliko a lugar iti Baguio City.
Kasaruno daytoy iti pannakaipaima dagiti dua a menor de edad iti Womens and Childrens Protection Desk idi kanikadua kalpasan ti panagimetda iti bladed weapons.
Maibasar iti report, dagiti dua a menor de edad ket maatap a miembro ti maysa a gang.
Nakumpiskar kadagitoy ti kutsilyo ken maysa nga note book a naglaon ti listaan dagiti miembroda a maatap a nagbayad para iti membership iti maysa a grupo.
Iti sidong ti ordinansa ti Ordinance 20-1984 nga inamyendaran ti Ordinance 46-1995, awan ti asinuman nga indibidual ti mapalubosan nga agimet ti bladed weapons kas kadagiti kutsilyo, icepick ken dadduma pay nga patadem wenno deadly weapons nu adda iti ruar ti pagtaengan dagitoy.
Mangrugi iti P1,200 agingga P2,000 ti maipataw a multa wenno panakaibalud mangrugi iti 4, 8 ken agingga iti 12 a bulan dagiti aglabsing iti ordinansa.
