Maidagdagadag kadagiti mammanday-linteg nga ipangpangrunada ti pannakaipasa ti divorce bill tapno magun-od ti diborsio nangruna kadagiti indibidual nga agsagsagaba ti abusado a relasion.
Iti naipatungpal a BBC World Service’s World Questions program, napagsaritaan da sigud a Supreme Court Justice Antonio Carpio, Akbayan Citizens Action Party president Rafaela David, author and political analyst Richard Heydarian, ken dean ti School of Management idiay Ateneo de Manila University Roberto Galang ti nagduduma nga isyu pakairamanan ti diborsio.
Sigun kenni David, nabayagen a “dilemma” iti pagilian a Pilipinas ti divorce bill ken namnamaenda a maipasa daytoy babaen ti panangidaulo ni Senator Risa Hontiveros nga agserserbi kas chairperson ti Senate Committee on Women, Children, Family relations, and Gender equality.
Patien ni David a ti abusado a relasion ket maysa kadagiti mangpirpirdi iti maysa a pamilia ken rumbeng a maipaay ti maikadua a gundaway ti panagayat.
Impeksa met ni Carpio ti suportana iti pannakaipasa ti nasao a gakat.
Kabayatanna, mangnamnama ni Hontiveros a mapagtalantanan ti nasao a gakat iti senado.
