BAGUIO CITY – Al-allukuyen manen ti Baguio City Veterinary Office (CVO) dagiti residente ti siudad a manggundaway iti libre a castration, deworming ken rabies vaccination kadagiti aso ken pusa.
Sigun ken ni City Veterinarian Dra. Brigit Piok, babaen iti daytoy ket mailiklik dagiti taraken nga aso ken pusa iti nagduduma a sakit.
Kinuna a manipud nangrugi ti agdama a tawen ket adu dagiti viral diseases a kimmapet kadagiti aso ken pusa iti siudad.
Kinuna ni Piok nga agrikos manen dagiti kameng ti City Veterinary Office iti nagduduma a barangay iti siudad tapno maikampania ti programa dagitoy ken ti ipapaayda a libre a serbisio.
Innayon ti opisial nga ita a Mayo ket nakatuding nga agturongda sadiay Lower QM, Padre Zamora ken Padre Burgos, Baguio City.
Kinunana a babaen iti programa manipud iti CVO ket malapdan ti panagwaras ti makapapatay a rabies virus.
