BAGUIO CITY- Inlawlawag ti Abra Provincial Election Supervisor nga awan pay ti munisipyo sadiay Abra ti pormal a naipasidong iti red category para iti election 2022.
Iti interview ti Bombo Radyo Baguio kenni Provincial Election Supervisor Atty. Ricardo Lampac, kinuna a saan a naipasidong ti intero a probinsia ti Abra iti partikular nga kategorya.
Sigun kenkuana, agtaltalinaed iti yellow, green ken orange dagiti sumagmamano nga munisipyo sadiay Abra kas maibasar iti maudi nga update ti COMELEC kadagitoy idi kalman.
Kinunana nga agtaltalinaed met a dua ti bilang ti election related incidents a nailista dagitoy kangrunaan ti shootout incident a nakatayan ti bodyguard ni Pilar Vice Mayor Jaja Josefina Somera Disono.
Manarimaan met ti beripikasyon nu maibilang kas election related incident ti kaudian a pammaltog iti maysa nga Kapitan ken maysa a Kagawad sadiay Pilar ken Dolores.
Inlawlawagna pay ti nagdumaan ti panakaipatalged ti linak ken kappia sadiay nu maipasidongda iti naing-inget nga kategorya wenno ti Comelec Control .
Sigun kenkuana, manayunan laeng ti pwersa dagiti otoridad ngem agpada a nainget a maiwanawan ti linak ken kappia kabayatan ti eleksion.
Inyunay-unayna nga agtaltalinaed a natalinaay ti probinsia ti Abra kagiddan ti agtultuloy a panagwanawan dagiti otoridad.
