Suksukimaten dagiti opisyales ti pannakaipatakder ti maikadua a Material Recycling Facility idiay Barangay Irisan, Baguio City.
Iti panakiuman ti Bombo Radyo kenni Brgy. Irisan Captain Arthur Carlos, ikagkagumaanda nga agbiruk iti espasyo a pakaipaskedan ti nasao a pasilidad.
Sigun ken Carlos, maysa daytoy a wagas tapno masolusyonan ti problema iti basura iti nasao a barangay ken maliklikan a maysa laeng a purok ti pakaibellengan dagiti basura sadiay.
Iti sabali a bangir, manamnama a maipasdek ti baro a barangay hall iti nasao a barangay sakbay nga aggibos ti agdama a tawen.
Sigun paylaeng kenni Carlos, naitantan ti panakaileppas ti panakaaramid ti nasao a pasdek gapu ta manarimaan ti panakakita ti kaso seknan iti panakaibangon daytoy.
Innayona pay a babaen iti panakaipasdek ti baro a pasilidad ket ad-adda a mapasayaat ti serbisyo dagitoy kadagiti residente.
Kabayataanna, maysa kadagiti problema dagitoy ti nailet nga espasyo ken kinakurang ti paradaan iti barangay hall dagitoy.
