Ad-adalen ti Legislative-Executive Development Advisory Council (LEDAC) ti panggep a maituloy ti pannakaipatungpal ti Barangay and Sangguniang Kabataan Elections (BSKE) inton Disiembre, sigun kenni Senate President Francis “Chiz” Escudero.
Iti Senado idi kalman, impakaamo ni Senador Escudero kadagiti kameng ti Liga ng mga Barangay idiay Naga City, Camarines Sur, maipapan iti nasao a banag.
Nakipaset pay bayat ti panagtaripnong ni sigud a Vice President ken incoming Naga City mayor Leni Robredo.
Para kenni Robredo, namnamaenna a saan a maituloy ti eleksion iti agdama a tawen gaputa maipaayan gamin dagiti opisial iti ababa a termino.
Idi laeng bulan ti Abril, inruar ti Commission on Elections (Comelec) ti calendar of activities para iti 2025 BSKE.
Maibasar iti Comelec Resolution No. 11132, ti 2025 BSKE ket naikeddengan inton Disiembre a uno wenno aldaw ti Lunes.
