BAGUIO CITY – Maibalballaag kadagiti online sellers ditoy syudad a saan a rehistrado ken saan nga agbaybayad iti buwis iti Bureau of Internal Revenue (BIR) a posible a sumango dagitoy iti reklamo wenno kaso a simple tax evasion.
Sigun ken Wilfredo Reyes, Revenue District Officer ti Baguio City, panaglabsing iti linteg ti saan a panagrehistro ken saan a panagbayad iti buwis dakkel wenno bassit man iti income wenno masapsapulan.
Kinunana a nailanad iti linteg nga amin a negosyo a kumitkita uray kadagiti social media platform ket nasken nga agrehistro iti BIR para iti resibo tapno adda pagbasaran ti bureau iti singirenda a buwis.
Malaksid kadagiti online seller karaman kadagiti bambantayanda iti agdama ket dagiti online tutorial services ken media influencer nga agin-income metlaeng kadagiti nagduduma a social media platform.
Balakadda kadagiti maseknan, agrehistro ken agbayad dagitoyen iti buwis iti BIR sakbay a mapilaanda iti reklamo wenno kaso a mangitonda iti panakadadael ti negosyo ken panakapukaw ti incomeda.
