Manarimaanen ti panag-asikaso ti Overseas Workers Welfare Administration (OWWA) kadagiti kasapulan wenno requirements tapno maiyawid iti pagilian dagiti bangkay dagiti tallo nga overseas Filipino workers (OFW) a pimmusay bayat ti nakaro a panagtudo ken panaglayos idiay Dubai, United Arab Emirates idi Abril 16.
Maibasar iti report, nabigbig dagiti tallo a bangkay dagiti overseas Filipino workers (OFW) a da Dante Casipong, Jennie Gamboa kenni Marjorie Saquing.
Pimmusay ni Casipong kalpasan a natinnag ti lugan daytoy iti sinkhole, bayat a da Gamboa ken Saquing ket pimmusay kalpasan a nasuffocate dagitoy iti uneg ti shuttle service da.
Sigun kenni Overseas Workers Welfare Administration (OWWA) Administrator Arnell Ignacio, dagus dagitoy a nakipagsarita kadagiti pamilya dagiti nasao a pimmusay para iti dagus a pannakaiyawid dagiti bangkay dagitoy.
Nupay kasta, innayon ni Ignacio a saanda pay a maibaga ti eksakto a petsa ti pannakaiyawid dagiti bangkay.
Kabayatanna, impasigurado ti Overseas Workers Welfare Administration (OWWA) a nakasagana dagitoy a tumulong apaman nga adda dagiti overseas Filipino workers (OFW) nga agtarigagay nga agawid iti pagilian.
