BAGUIO CITY – Mapagam-amkan ti panakairaman dagiti agtutubo wenno menor edad kadagiti iligal a transaktion ti iligal a droga ditoy Baguio City.
Sigun kenni Baguio City Police Office – Community Affairs Division head PMaj. Judy Jasmine Palicos, nupay saan a menor de edad ti kaaduan kadagiti matiltiliwda mainaig iti iligal a droga ngem adda latta dagiti makemkemmegda nga agtutubo iti binulan nga operasyonda kontra iti iligal a droga.
Dinakamatna a kaaduan kadagiti matiltiliwda a menor de edad ket out of school youth wenno saan nga agad-adal.
Imbinglayna a maysa ti kinarigat ti biag kadagiti rason no apay nga adda dagiti agtutubo a makipaspaset iti panagilako iti iligal a droga.
Kagiddan iti dayta, kinunana a maipapa-ima dagiti matiltiliwda nga agtutubo iti Department of Social Welfare and Development para iti pannakaipasidong dagitoy iti kaskenan a programa ken panakiballaet.
Nupay kasta, kinunana nga ad-adda nga inirtenganda ti kampanyada partikular ti information desimination campaign nangruna kadagiti nagannak tapnu tumulongda iti panakaiwanwan dagiti annakda ken mailiklik dagitoy iti iligal a droga.
Baguio City Police Office – Community Affairs Division head PMaj. Judy Jasmine Palicos
