BAGUIO CITY – Dinayaw ti Department of Health – Cordillera dagiti maisaysayangkat a mobile vaccination (MoVacc) kadagiti nagduduma a lugar iti rehiyon kagiddan ti vaccination roll-out a maisaysayangkat iti agdama.
Impeksa ni DOH-Cordillera Assistant Regional Director Dr. Amelita Pangilinan ti panangdayawna kadagiti Municipal Health Officers a mangisaysayangkat ti mobile vaccination kadagiti nasusulinek a lugar tapnu laeng mabakunaan dagiti senior citizens ken dagiti person with disabilities a saan a makabael nga agturong kadagiti vaccination sites.
Kinunana a maysa ti rehiyon a nagbalin nga ehemplo iti mobile vaccination program iti pagilian nangruna ta maisaysayangkat kadagiti kabambantayan wenno nasusulinek a lugar.
Innayonna a babaen iti MoVacc ket mapapartak ti vaccination rollout nangruna kadagiti adda iti priority categories gaputa narisgo dagitoy iti virus ti COVID-19.
Dinakamatna nga epektibo ti panagpabakuna kontra iti Delta variant nupay inaklonna a parikutda ita ti kinakurang ti suplay ti bakuna a maiturturong iti rehiyon.
