--Ads--
Imbilin ti maysa a korte kenni Kingdom of Jesus Christ (KOJC) leader Pastor Apollo Quiboloy a maisubli manen iti pagbuladan idiay Pasig City inton Pebrero a dose, sigun iti abogadona.
Naiturong gamin ni Quiboloy iti pag-agasan idiay Pasig idi Enero disi otso gapu iti panaguyek ken rigat ti panagangesna.
Naduktalan a na-diagnosed isuna ti “community acquired pneumonia”.
Nupay kasta, kinuna ti abogado ni Quiboloy a posible a mangipilada ti mosion a nakabasar iti kondision ti dadaulo ti nasao a simbaan.
Ni Quiboloy nga agtawen ti pito pulo ket uppat ket naibalud gapu iti kasona a qualified human trafficking ken seksual a panangabuso, nga ikalkalinteganna nga inaramid laeng dagiti kameng ti nasao a simbaan.