Impila ni Senator Imee Marcos ti Senate Bill 2067 para iti pannakaiyakar ti Barangay and Sangguniang Kabataan Elections (BSKE) iti October 2027 manipud Nobiembre 2026.
Daytoy ket kalpasan a naigiddan iti All Souls’ Day intun Nobiembre 02, 2026.
Kabayatanna, namnamaen ni Commission on Elections (Comelec) Chairperson George Garcia a madesisyonan intun Setiembre no maitantan ti eleksyon wenno saan.
Sigun kenkuana, kiniddawna madesisyonan daytoy sakbay nga agleppas ti Setiembre agsipudta, naitunding ti pannakaipila ti kadidatora intun Setiembre 28 agingga Oktobre 5, 2026.
Inlawlawag ni Garcia a nasaysayaat a nasapsapa a madesisyonan tapno mapakaammuan dagiti agpampanggep nga agkandidato, field personnel ti COMELEC ken tapno agsagana a nasayaat ti ahensiya para iti Bangsamoro parliamentary election.