Imbilin ti Malacañang iti Department of Foreign Affairs ken Department of Justice a kanselaenda dagiti Philippine Passport ni sigud a Bamban Mayor Alice Guo, dagiti kakabsatna a da Wesley Leal Guo ken Sheila Leal Guo.
Karaman iti nasao a pammilin ti autorisado a pannakabagi ti Philippine offshore gaming operator (POGO) a ni Katherine Cassandra Li Ong.
Kasaruno daytoy iti impablaak ni Senator Risa Hontiveros itay nabiit a pimmanawen iti pagilian Guo wenno ti Chinese national a ni Guo Hua Ping babaen iti Philippine Passport daytoy.
Maipalagip nga immuna a kinuna ni Stephen David ti legal counsel ni Guo nga adda pay laeng ditoy iti pagilian.
Nupay kasta, kinompemar ni Bureau of Immigration (BI) spokesperson Dana Sandoval idi laeng kalman nga adda ni Guo sadiay Indonesia.
Iti agdama, manarimaan ti panangsukimat ti Bureau of Immigration, no nagusar ni Guo iti chartered flight wenno informal port a paturong sadiay Malaysia.
Malaksid iti dayta, posible a pimmanaw babaen ti “southern backdoor” wenno iti Mindanao.
Kabayatanna, nangipaulog iti pinal a pakdaar ni Justice Secretary Jesus Crispin Remulla kadagiti amin Bureau of Immigration personnel nga addaan iti partisipasion iti panaglibas ni Guo iti laksid dagiti nainget a restriksion ti gobierno a rumuarda ken agsaoda sakbay a maduktalan amin ti kinapudno.
