Makidkiddaw iti Department of Foreign Affairs ti dagos a pannakakanselar ti Philippine passport ni Kingdom of Jesus Christ (KOJC) leader Apollo Quiboloy gapu iti panagkedkedna a sumango iti naipila a kaso kontra kenkuana.
Sigun kenni Senator Risa Hontiveros a mangidadaulo ti imbestigasion ti Senado kontra iti maatap a human trafficking ken sexual a panag-abuso ni Quiboloy, impaganetgetna a kasapulan nga aramiden ti gobierno ti amin a panagregget tapno makemmeg ti dadaulo iti nasao a simbaan.
Kinunana a rumbeng nga agpakita iti Senado wenno iti korte ni Quiboloy, saan a babaen ti mensahena a nakarekord a kas mang-in-insulto iti kabaelan ti gobierno.
Kinunana pay a nu nakemmeg dagiti Senador a naglabsing iti linteg, rumbeng met a matiliw ti lider ti simbaan.
Ni Quiboloy ket agdama nga aglimlimmeng iti baet ti pannakaipaulog ti warrant of arrest kontra kenkuana gapu iti mapapati a human trafficking, sexual assault ken maltreatment.
Nangipaulog pay ti Senado ti arrest order kontra iti nasao a dadaulo ti simbaan gapu iti saanna a pannakipaset iti imbestigasion iti maatap a human trafficking ken sexual abuse dagiti sumagmamano a miembro ti simbaan daytoy.
Iti agdama, awan paylaeng ti komento ti abogado ni Quiboloy a ni Ferdinand Topacio.
