Mangnamnama ni Alec Mapalo, City Tourism Officer nga umado dagiti turista a bumisita iti siudad ti Baguio kadagiti sumarsaruno a lawas.
Daytoy ket kalpasan a naobserbaranda ti nakissayan dagiti dadduma a government agency conventions manipud iti kabangibang a lugar ken dadduma pay nga aktibidad a maipatpatungpal iti siudad.
Naobserbaran metlaeng daytoy dagiti sumagmamano a function halls wenno dadduma a hotels iti siudad.
Nupay kasta, impetteng ni Mapalo a naobserbaranna a ngimmato ti tourist arrival iti siudad nangruna iti weekend nu idilig kadagiti naglabas a bulan.
Impeksa pay ni Mapalo nga immadu dagiti turista idi binmaba ti presyo ti lana.
Sigun kenkuana, masdaaw dagitoy gapu ta addu latta ti agpaspasyar idiay Burnham Park uray nu nakasara ti Burnham Lake gapu iti pannakarehabilitate daytoy.
Impettengna a ipakpakita laeng daytoy a saan laeng a dagiti nagduduma a tourist spot ti gagara dagiti turista nu diket ti mismo a siudad.
Imbinglay met daytoy nga addu pay kadagiti tourist spot ti maipaspasidung iti rehabilitasyon kas idiay Mines View no sadino posible a napaut pay ti pannakatarimaanna.
Nupay kasta, kinunana nga apaman a malpas amin dagiti rehabilitasyon, nasaysayaat ton daytoy saan laeng a para kadagiti turista nu di ket para metlaeng iti pagsayaatan dagiti locals.
Kabayatanna, nagpallagip daytoy kadagiti turista iti responsable a panagtravelda. Kiniddaw pay daytoy a sumurot ken respetuenda dagiti nagduduma nga ordinansa iti siudad nangruna iti traffic rules ken regulations daytoy. // Bombo Noveh Organo
