Marambakan ita a Biernes, Agosto 21 ti Ninoy Aquino Day wenno pannakalagip iti pimmusay daydi sigud a Senador Benigno “Ninoy” Aquino Jr.
Maibilbilang daytoy nga special non-working holiday, kalpasan nga opisial a nairaman iti listaan dagiti special non-working holidays para iti 2026.
Daytoy ket babaen iti Proclamation No. 1006 nga impaulog ni President Ferdinand Marcos Jr.
Maipalagip a napapatay ni Aquino idi Agosto 21, 1983 iti sigud a Manila International Airport, saan a nagbayag kalpasan ti panagsublina iti Pilipinas manipud iti dandani tallo a tawen a pannakaiturongna sadiay Estados Unidos.
Ti pannakapapatayna ti nangpataud iti pungtot ti publiko ken nangpapigsa iti oposision kontra iti diktadurya ni sigud a President Ferdinand Marcos Sr.
Nangitunda metlaeng daytoy iti 1986 EDSA People Power Revolution a nangpatingga iti nasurok dua a dekada a panagturay ni Marcos Sr. iti pagilian.
Iti sidong ti Republic Act No. 9256 a napirmaan idi 2004, naituding ti Agosto 21 kas Ninoy Aquino Day ken national non-working holiday.
Kas special non-working holiday, maikari iti 30% a kanayunan a sweldo dagiti empleyado a sumrek ita nga aldaw.
Maipatungpal metlaeng ti “no work, no pay” policy para kadagiti empleyado a saan a sumrek iti trabaho, malaksid no addaan ti kompania iti espesipiko a pagalagadan.