Nangiruar ti UN Independent International Commission of Inquiry iti report a mangibagbaga nga adda ti crimes againts humanity a napasamak iti ipupusay dagiti ubbing a Palestinian idiay Gaza ken West Bank.
Karaman metlaeng ditoy ti posible a war crimes, ken genocide.
Sigun iti UN Independent International Commission of Inquiry, karaman ti East Jerusalem ken Israel kadagiti kitkitaenda manipud nagrugi ti giera iti nagbaetan ti Israel ken Hamas idi Oktubre 7, 2023.
Maibasar iti datos dagitoy, dumanon iti agarup 30% nga ubbing ti pimmusay sadiay Gaza.
Malaksid iti dayta, maatap a dumanon iti agarup 20,000 nga ubbing ti pimmusay manipud Oktubre 2023 agingga Oktubre 2025.
Sigun iti commission chair a ni Srinivasan Muralidhar, adda ti ebidensia a puntiria ken ingagara ti Israeli security forces a pinapatay dagiti ubbing a Palestino.
Kabayatanna, inlibak ti Israel dagiti alegasion ken nga inawaganda a “defamatory” ken “libelous”.
Impetteng ti Israel nga ar-aramidenda ti amin a kabaelanda tapno malapdan ti pannakadangran dagiti sibilian.
Kinuna pay ti Israel a ti operasionda ket paset ti sungbatda iti inawagan dagitoy a “constant terrorist threat” iti rehion.
