Impeksa ni Julian Pelitan Jr., barangay kagawad iti Buyagan,La Trinidad, Benguet a panawenen tapno maipaayan iti atensyon dagiti sewage system iti munisipyo ti La Trinidad, Benguet partikular kadagiti flood prone area.
Kasaruno daytoy ti napasamak a panaglayos iti Puguis-Buyagan Rotonda ita nga aldaw.
Iti interview ti Bombo Radyo kenkuana, kinunana saan laeng a daytoy ti umuna a gundaway a napasaran ti panaglayos agsipud ta napasaran metlaeng daytoy idi napalpalabas a bulan bayat ti napigsa a panagbayakabak ti tudo partikular iti rabii.
Innayonna met nga aktibo dagitoy kaduana dagiti dadduma nga opisyal babaen iti panangipatpatungpalda iti clean-up drive operation.
Kabayatanna, kidkiddawenna met ti tulong ken kooperasyon dagiti umili sadiay babaen iti saan panangibelleng iti basura kadagiti kanal tapno maliklikan ti pannakaipullat dagitoy.
