Tarigagay ni President Ferdinand “Bongbong” Marcos Jr. iti maika-67 a panagkasangayna a mapasayaat pay ti sektor ti agrikultura iti Pilipinas tapno nasaysayaat ti panagbiag dagiti lokal a mannalon ken dagiti pamiliada.
Daytoy ket impeksana bayat ti pannakaiyuswat ti Agri-Puhunan at Pantawid (APP) program ken pannakaiwaras ti Certificates of Condonation in Agriculture ken panangipaay ti Agri Credit Assistance kadagiti umili idiay Nueva Ecija.
Ni President Marcos Jr a sigud a nagserbi kas secretary ti Department of Agriculture ket ibilbilangna dagiti mannalon a bannuar iti Pilipinas.
Naiyuswat idiay Guimba, Nueva Ecija ti Agri-Puhunan at Pantawid Program, maysa a “credit facility” a mangipapaay iti “pautang” a nababa ti interesna, ken addaan panggep a tulongan dagiti mannalon a makagun-od kadagiti kasapulan a pondo para kadagiti kasapulanda iti agrikultura.
Indauloan ni President Marcos Jr ti “turnover” kadagiti napateg a farm machinery ken kagawaan kadagiti benepisiario manipod iti Central Luzon.
Kabayatanna, sigun kenni Department of Agriculture Secretary Francisco Tiu Laurel Jr., ti Agri-Puhunan at Pantawid (APP) program ket nakalinia iti panggep ti administrasion ni Marcos a pagbalinen nga ad-adda a bankable ti panagtalon, mangallukoy iti ad-adu nga “investors,” ken mapasayaat kasasaad ti panagbiag dagiti mannalon, panangsigurado iti national food security ken sustainability iti Pilipinas.
Sigun pay iti nasao nga ahensia, babaen ti pannakitinnulong iti Development Bank of the Philippines, napataudda iti umuna a P3-bilion a pondo para kadagiti nababa ti interesna a pautang ken subsistence allowance para kadagiti mannalon.
